中國足球研究院:VVD係第5代華裔!

2019年06月10日 19:00
東網電視
更多新聞短片
(互聯網)

華裔球員研究專家Jallo_Tang,近日發布華基爾雲迪積克母親嘅先祖,極可能係中國廣東客家人陳火秀,VVD就係佢嘅第5代玄外孫,如果佢研究結果正確,VVD就係有中國血統。

Jallo_Tang係中國足球研究院嘅球員研究專家,近日佢喺社交網公布研究結果,話VVD媽媽嘅先祖,就係於中國廣東出世嘅客家人陳火秀(Chin Fo Sieeuw)。1872年陳火秀喺廣東出世,1918年去到蘇里南做外勞,仲喺當地生咗8個小朋友。喺1936年,陳火秀決定帶2個仔返中國,但其中1個因為生病,所以陳火秀就懶低佢返中國,同另一兒子搭船返中國。而陳火秀嘅後人,依家極可能仲係於廣東定居。

VVD英文全名係Virgil VAN DIJK,VAN DIJK係佢個姓,咁點解佢球衣印上Virgil?係因為其父當日拋妻棄子,VVD同細佬妹都係由媽媽帶大,其母全名就叫Hellen Fo Sieeuw。

唔少國內網民就表示,就算VVD有中國籍都冇用,咁嘅研究冇乜價值,就算VVD有機會攞金球獎,中國足球依然係一池死水;有網民仲抵死咁話,係咪想VVD入籍中國做歸化兵,認真搞笑。