美斯想首贏大賽?阿根廷美洲盃首仗即輸

20190616
東網電視
更多新聞短片
(法新社)
美斯想攞第一次大賽冠軍?分組賽第一場就輸波喇!美洲國家盃B組賽事,阿根廷出戰哥倫比亞,藍白兵團有美斯、阿古路、迪馬利亞等球星正選出場,但班波同俄羅斯世界盃時發揮一樣咁差,連美斯亦於門前浪費入波大好機會。哥倫比亞終憑下半場兩番妙射破網,擊敗阿根廷2:0。
美斯貴為當世球王,但出道以來從來未攞過大賽冠軍,對上2屆美洲國家盃雖然都入到決賽,不過都不敵智利僅得亞軍。今年已經32歲嘅美斯,賽前已經認矮仔話阿根廷唔係奪標熱門,原來佢真係好了解隊波,首場分組賽已經落筆打三更。
阿根廷成個上半場最佳入波機會,係美斯於後場大腳妙傳上前,但哥倫比亞門將奧斯賓拿出迎快阿古路一步解圍。阿根廷後防一向唔穩陣,門將阿曼尼仲高章玩嘢,門前交畀奧達文迪被偷甩皮球,好彩隊友喺占士洛迪古斯起腳前篤出底線。
下半場阿根廷開出角球,奧達文迪近門一頂被救出,美斯於6碼點補頂竟然連龍都唔中。你唔入就我入,羅渣馬天尼斯於左路扣入中路起右腳射入網仔打開紀錄。阿根廷落後之後沒精打采,美斯孤立無援冇料到,哥倫比亞憑杜雲沙柏達門前入多粒,以2:0贏波,12年來首次擊敗阿根廷。
阿根廷輸波全失3分,未來2仗對手只係巴拉圭同卡塔爾,會一而再、再而三令球迷失望?定係可於谷底反彈?睇今仗表現,阿根廷要回勇的確困難重重。
立即參加「賞您睇」:http://bit.ly/2JWKULh 
Click下面粒掣,儲on.cc coins!機票、家電、超市禮券、過萬份獎品等緊你。