曼聯焗用35萬鎊周薪綁實福仔

曼聯除咗面臨中場保羅普巴要求轉投皇馬之外，前鋒拉舒福特亦成為皇馬同巴塞隆拿爭奪目標，紅魔鬼為免呢位21歲英格蘭國腳離隊，可能焗住開出35萬鎊周薪同福仔續約。

拉舒福特上季英超射入10球，特別係蘇斯克查領軍之後，表現大勇，成為球隊鋒線最具威脅人物，而且佢年輕，仲係本土球員，完全符合晒蘇B推行「年輕本土化」嘅方針，更加要留住呢位未來支柱。

由於拉舒福特只剩下1年合約，會方必須盡快出手，否則明年約滿，隨時人財兩失。更何況兩大西甲豪門皇馬同巴塞隆拿都對拉舒福特虎視眈眈，如果曼聯攞唔出「誠意」，就難以留住佢。

曼聯內部人士指，拉舒福特雖然喜歡由蘇斯克查執教，但睇到阿歷斯山齊士有50萬鎊周薪，而自己身為主力前鋒，冇理由人工同A山相差太遠，所以曼聯呢35萬鎊周薪絕對唔慳得。

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。