利物浦王牌　趕唔切英超開季上陣！

應屆歐聯冠軍利物浦，眾所周知前線依賴3大王牌攻堅，穆罕默德沙拿、沙迪奧文尼同羅拔圖法明奴基本上係紅軍近2季成功關鍵。今個夏天雖然冇世界盃或歐國盃，但佢哋3個分別要出戰非國盃同美洲國家盃，其中因為塞內加爾更殺入非國盃決賽，意味住文尼或者趕唔切於英超揭幕戰對諾域治披甲。

文尼今屆以隊長身份帶領塞內加爾征戰非國盃，主辦國埃及王牌沙拿鎩羽而歸，反而文尼見關過關，於4強加時貢獻助攻，殺敗突尼西亞進身決賽，同有馬列斯壓陣嘅阿爾及利亞爭冠。非國盃決賽將於本周五舉行，剛啱距離英超揭幕戰3個星期。

之前沙拿、法明奴同門神艾利臣比加，於國際賽後高普都各畀3星期休息時間，所以文尼都極可能獲得3周假期，所以極可能錯過頭輪比賽。雖然文尼於歐聯決賽後已抖1周，但高普呢方面一向小心，為免主力一開季就冇電，文尼分分鐘抖多過1場新季聯賽。

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。