港超聯　「阿滙」「嘉緯」9年後再重聚

追隨「堅Sir」轉投東方龍獅、與羅志焜一同出任助教的「阿滙」李恆滙，自言今次轉會乃一次難得的學習機會，會依舊傾盡全力協助「堅Sir」。此外，最開心是可以跟昔日港青隊友林嘉緯再續前緣。

「我同『嘉緯』喺港青幾乎咩賽事都踢過，好似獅城盃、全運會、亞運會，同埋奧運外圍賽咁。之後喺傑志都做咗好長時間隊友，之後喺2010年我去咗大中先同佢分開，估唔到9年之後又可以同隊，感覺好特別。」笑起上來跟藝人袁偉豪「餅印」一樣的「阿恆」笑說。

至於「嘉緯」就表示：「我哋14、5歲就一齊踢，之後佢踢香港08，我就去咗花花，後尾又一齊踢傑志，之後佢外借咗出去，我哋就一直無再同過隊。佢好波o架，喺香港08又係隊長，可惜敵唔過傷患先咁早退役。隔咗咁耐終於同番隊喇，一齊努力啦！」