利物浦史上最堅　過億鎊合約綁沙拿！

連續2季英超神射手、雙料英格蘭足球先生、歐聯決賽入波捧盃功臣，利物浦要留穆罕默德沙拿，的確係正常不過。沙拿被廣泛認為係紅軍王牌，而利物浦認為留住現時陣容，比用天價買新球星更重要，故傳出會方提前同沙拿傾新約，將佢周薪由20萬鎊加到43萬鎊簽5年，成張約總值1.12億鎊！

沙拿上季以22球，同隊友沙迪奧文尼同阿仙奴奧巴美揚，齊封英超神射手，而且加盟後又屢破球會入球紀錄，如果紅軍想挑戰曼城英超霸權，務必要留住沙拿。英國《太陽報》報道，雖然沙拿上個夏天先同紅軍續約，並留到2023年，但為免遭到頂級球會搶人，紅軍遂主動改善合約條件，並希望呢名「埃及國王」可以簽到2024年。

周薪43萬鎊絕對屬英超頂薪，有傳迪基亞同曼聯為合約周旋幾年，都係要求曼聯加到約35萬鎊周薪左右，故呢個價真係好吸引，相信沙拿唔會拒絕。

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。