球王定拳霸？伊巴謙莫域打凹對手頭骨

瑞典球王伊巴謙莫域好波就係人都知，雖然已經成37歲人，但都仲係好鬼勁。日前佢喺美職洛杉磯打吡就連中三元，帶領銀河3比1擊敗FC洛杉磯全取3分。不過，原來喺全球勁讚佢嘅背後，「呂布」喺末段曾經一次爭頂肘擊對方守將艾莫尼亞，仲打到呢位利比亞球員太陽穴凹陷，嚟緊要入院做手術添！

根據《洛杉磯時報》報道，球圈唔少人都認為伊巴謙莫域嘅犯規絕對需要畀牌，而事後FC洛杉磯嘅艾莫尼亞出現顴骨骨裂兼太陽穴凹陷，並預計會喺日內接受手術。同時間，該報亦建議美職紀律委員會去認真研究呢件事，再作判決。

事實上，賽後FC洛杉磯有教練團成員就曾想向「呂布」攞番公道，出現衝突場面，但伊巴謙莫域就話知你，仲爆粗鬧番轉頭，認真冇品呀！

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。