賽馬會傑志中心盃 「藍鳥」挑戰「藍月亮」

20190723
東網電視
更多新聞短片
傑志同曼城喺大球場開P!
全香港球迷引頸以待的觸目大戰,「賽馬會傑志中心盃」東道主傑志迎戰英超盟主曼城,賽事周三(24日)晚8點假香港大球場上演。今次乃傑志繼2017年對熱刺後,再次邀得英超勁旅訪港,賽前雙方明言賽果並不重要,必定全情享受比賽,並以表現取悅球迷。
傑志早前曾到南韓集訓,期間先後與釜山交通公社和浦項制鐵「拍跳」,錄得1勝1和戰績,新任主帥施利斯高域昨日在賽前記者會上表示:「目前我哋嘅體能狀態準備得好好,今場我期望大家都可以好好享受比賽,踢場好波畀球迷睇!」
「藍鳥」傑志之前曾出戰過阿仙奴、曼聯、巴黎聖日耳門、熱刺等勁旅,對戰外隊經驗豐富的隊長黃洋指出,與曼城交手將有助香港足球進步:「今次再有機會去挑戰歐洲頂級球隊,將會係一次好難忘嘅經驗,希望對曼城嘅比賽可以令球迷開心。我哋想像到對曼城有幾難踢,需要不斷戰鬥展示熱情,希望喺比賽中得到一啲嘢,去幫助香港足球日後嘅發展。」他續稱:「曼城上場對狼隊就算賽果係0比0,佢哋控球率都接近7成,作為防守球員,我希望上半場可以零失球!」
曼城剛在上周的「英超亞洲挑戰盃」先後面對韋斯咸和狼隊,雖然未能奪冠,但領隊哥迪奧拿相當滿意球隊表現。球隊先後到訪過上海和南京,再到香港,「哥帥」承認對球員適應有幫助,同時強調賽果只是次要:「我哋知道傑志係香港一支強隊,將為我哋帶嚟唔少威脅,但賽果唔係最重要,最重要係球隊要喺季前建立活力同風格,為之後『社區盾』對利物浦做好準備,呢樣先最重要!」
有份出席記招的曼城翼鋒史達寧則笑言:「首先希望我夠弗,如果有得上陣嘅話,就想提升體能狀況,最後希望入到波啦!」在昨午的公開操練中所見,「藍月亮」眾將神情輕鬆,惟在練習對賽期間,「哥帥」多次暫停練習並向球員講解及示範,表情一貫「肉緊」。抵港首天曾被球迷投訴「黑面」、「唔友善」的曼城大軍,昨日操練卻十分「識做」,除在末段練習射門時,多次射入角度刁鑽的靚波外,收操後更向球迷大派「福利」,簽名、影相有求必應,讓在場1,176名粉絲非常興奮及「四萬咁口」!
「賽馬會傑志中心盃」
賽事:傑志vs曼城
時間:晚上8點
場地:香港大球場
票價:$1190、$890、$590、$350 、$250(特惠票)
網上購票: https://bit.ly/2YoSXqR