機會嚟啦！久保建英有望直升皇馬一隊！

皇家馬德里球星馬高阿辛斯奧喺熱身賽重傷，新球季幾乎肯定報銷，「銀河艦隊」要點樣填補呢位翼鋒同進攻中場嘅空缺，成為西班牙球壇熱話。

西班牙《馬卡報》同《阿斯報》報道，皇馬唔會為呢個位買球員，加里夫巴利同占士洛迪古斯嘅出售計劃亦冇受影響，因為球隊內部已有唔少選擇，包括雲尼斯奧斯祖利亞、洛迪高高斯同巴謙戴亞斯3位重點新人，不過呢3位球員本來就已經喺施丹嘅計劃之中，所以人數上要搵人頂替，最有可能就係日本國腳久保建英！

皇馬球員編制上，久保建英係皇馬青年軍A隊，但佢今個夏天全程都係跟住一隊練習，而且喺操練期間嘅表現大獲好評。仲有一個關鍵因素係，久保目前以U19身份註册，咁就踢青年軍同一隊都冇次數限制，如果註册西丙嗰隊皇馬青年軍，上一隊次數有限制。如果施丹確定進行內部提拔，久保建英絕對係最先被考慮嘅人選！

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。