曼聯新隊長揭盎　球迷對蘇B決定好失望

曼聯上季隊長路爾斯華倫西亞離隊後，新隊長人選眾說紛紜，有傳聞話扭計想走嘅法國中場保羅普巴都係候選人之一。周六(4號)友賽AC米蘭後，曼聯領隊蘇斯克查親口宣布新隊長，就係英格蘭老將艾舒利楊格！

對AC米蘭一仗，西班牙門將迪基亞擔任隊長，即使艾舒利楊格半場仕替都冇改變，對於呢個隊長人選，蘇斯克查解釋：「迪基亞當然係其中一個(隊長)人選，不過如果艾舒利楊格正選上陣，佢(楊格)就會戴隊長臂章。」再被追問係咪代表艾舒利楊格正式成為曼聯隊長，蘇斯克查表示：「你可以咁講！」

艾舒利楊格同迪基亞都係2011年加盟，屬於曼聯目前效力時間最耐球員之一(基斯史摩寧喺2010年加入)。

不過，曼聯球迷對於表現急速下滑嘅艾舒利楊格做隊長就非常憤怒，大批球迷網上炮轟，球迷除咗唔想見到佢落場之外，佢喺曼聯嘅日子亦進入最後倒數，反而迪基亞唔單止係必然正選，而且預期未來幾年都會留低，畀佢做隊長可以保持球會穩定性。

球迷反應：

@AnyanwuSolace：唔合邏輯！點會搵個1季踢幾場嘅人做隊長？

@TalkTrafford：一齊祈禱佢(楊格)永遠唔會有機會上陣。

@NoelLEBRONGOAT：呢個決定已經證明蘇斯克查抵抄(魷)。

@ascid12：恥辱！曼聯淪落到搵一個連留隊資格都冇嘅人做隊長。

@khalid58561920：曼聯繼續沉淪。

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。