拜拜靴里拉　曼聯「新民選隊長」誕生！

新季英超曼聯有個好開始，主場4:0大勝車路士，呢個係自1965年以來，曼聯於頂級聯賽贏車仔嘅最大比數。今仗拉舒福特梅開二度，當福仔射入今仗嘅第3個入球之後，有位曼聯球員仲係好肉緊，大叫「我哋繼續再進攻」，佢就係中場博麥湯米尼。

麥湯米尼上季開始得到好多上陣機會，去到今夏自動縮短假期加操，已經令魔迷對佢愈來愈有好感，鬥車仔一戰佢正選上陣，全場非常拚搏表現一流。當福仔射入梅開二度嘅1球後，成班曼聯球員喺角球旗附近慶祝，雖然已領先到3球，但當時鏡頭影到麥湯米尼依然瘋狂叫喊激勵隊友，唔少魔迷都睇到呢一幕，不斷於網上激讚呢位22歲球員，話球隊已好耐冇一個咁熱血嘅球員壓陣，仲話希望麥湯米尼未來可以做曼聯隊長。之前安達靴里拉一直被封為曼聯「民選隊長」，自呢位西班牙球員離隊後，睇嚟佢已後繼有人。

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。