巴洛迪利搵到班落喇　新東家先硬食一嘢

今夏約滿法甲馬賽嘅意大利球星「巴神」巴洛迪利，喺早前同巴甲法林明高傾唔掂數之後，尋日突然宣布落實加盟意甲布雷西亞，年薪多達200萬歐元，雙方簽約3年。據聞布雷西亞仲為佢開出特別獎金，只要球隊成功護級，「巴神」又可以額外袋多200萬歐元，而即使護級失敗，佢又可以同布雷西亞自動解約回復自由身。布雷西亞為咗簽佢，真係就晒「巴神」呀！

29歲嘅巴洛迪利，之前喺意甲踢過國際米蘭同AC米蘭，今次回歸祖國，加盟出生城市球隊布雷西亞，「巴神」喺佢官方twitter話：「我終於返到我嘅城市，布雷西亞，我嚟喇！」不過值得一提，「巴神」之前效力馬賽期間，喺煞科一輪因為暴力犯規，被罰停賽咗4場，換句話講，佢嚟緊喺意甲開咧頭4輪都要停賽，包括想倒戈對前東家AC米蘭都唔得。

立即參加「賞您睇」： https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。