16歲PSG剋星　3大英超勁旅爭崩頭！

於法甲幾以1人之力，打爆巴黎聖日耳門嘅16歲雷恩中場卡馬雲加，可以話係一戰成名，據英國《太陽報》報道，原來熱刺於上季已希望捷足先登購入呢名安哥拉新星，據報曼聯同曼城亦對佢好有興趣，正密切注意佢嘅表現，可能喺下個轉會窗就出手搶人。

卡馬雲加於鬥PSG一役，面對對手兩大中場馬高華拉堤同馬昆奴斯哥利亞都毫無懼色，攻守功夫做到十足，除多次成功攔截對手同控制節奏外，仲頻頻引球上前進攻，以1名未足17歲嘅球員嚟講，真係睇到人眼都凸埋。雷恩主帥祖利安史堤芬表示：「卡馬雲加除咗係天才球員外，佢個人仲非常成熟，而且好尊重隊友，佢對住其他球員都虛心受教，所以所有隊員都好錫佢。」

據知除咗英超3大勁旅外，連巴塞隆拿同皇馬亦有意加入戰團搶人，而卡馬雲加經理人施素高，亦係奧士文尼迪比利嘅經理人，所以巴塞或者可以搶得先機斟人。

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。