【有片】尿不可忍！踢緊歐聯照「放水」

祖奧菲歷斯練波期間忍唔住喺場邊痾尿，其實好多球員都有類似經歷，莫講話只係練波，就算係踢緊正式比賽都話知你！最經典應該係德國門將列文，佢喺2009年以40歲之齡為史特加出戰歐聯，點知比賽期間突然人有三急，於是佢就走去龍門後面用廣告板掩護「放水」，當佢見到對手烏尼雷亞反擊，就第1時間衝返去龍門口把關。呢場波史特加最終贏3比1，而球證並冇察覺列文擅自離開球場，所以亦冇向佢出示黃牌。

另一單球場經典「放水」，就係2015年巴西盃8強大戰，甘美奧中場杜格拉斯臨開波嗰陣突然急尿，於是佢就Call齊隊友圍圈做人牆，自己就跪喺圈中間扮綁鞋鞋鬼崇痾尿，可惜鏡頭影到條「水柱」噴出而穿煲。杜格拉斯可以喺巴西足球聖殿馬拉簡拿球場嘅草地痾尿，足球生涯都算無憾。

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。