【有片】科蘭點皇馬巴塞死穴　馬體會有計

西甲一直係巴塞隆拿同皇家馬德里天下，不過兩大班霸今季開咧表現失準，馬德里體育會就3戰全勝獨佔鰲頭。雖然只係開季階段，不過馬體會名將科蘭接受西甲官方訪問，就直指皇馬、巴塞有問題，認為馬體會喺爭標上有優勢！

科蘭表示：「皇馬、巴塞有好多偉大球員，不過馬體會一樣有，好似祖奧菲臘斯、迪亞高哥斯達，馬體會用咗唔少年輕球員進行重建，季前熱身表現相當好，依家就睇佢哋聯賽踢成點。」呢位烏拉圭名將再指出皇馬、巴塞有問題：「為皇馬、巴塞創造歷史嘅球員，年紀已經愈嚟愈大，年輕化呢方面佢哋做得比馬體會慢，呢方面會係馬體會一大優勢。」

巴塞隆拿長年核心美斯、蘇亞雷斯、布斯基斯、碧基、拿傑迪錫、佐迪艾巴等全部都「3字頭」，奧士文尼迪比利等新星亦未能搶到主力位置；皇馬同樣係踢緊賓施馬、莫迪歷、沙治奧拉莫斯、馬些路等「老波骨」，年輕馬體會有力令西甲變天！

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。