全歐最爆射手6場入7球　佢來自諾域治！

提起歐洲頂級射手，必定提到美斯、C朗、穆罕默德沙拿、阿古路、史達寧等等，但新季最犀利、最具效率嘅，竟然係諾域治、芬蘭前鋒殺手迪姆普基。呢名外表粗獷嘅29歲前鋒，本季連國家隊比賽踢咗6場賽事入咗7球，當中有5場都有「士哥」，堅係估佢唔到！

迪姆普基本季橫空出世，先後攻破利物浦及車路士大門，對紐卡素更連中三元大演帽子戲法，成為芬蘭首席前鋒。於國家隊着上10號波衫嘅佢，近2戰鬥希臘同意大利，分別攻入12碼，為球隊一箭定江山殺敗希臘，已經成為國家英雄。

睇番佢本季於各項賽事踢咗6場波，只有對韋斯咸一戰未能入球，效率之高令人刮目相看。呢位射手大器晚成，之前佢踢西維爾、些路迪等球會都冇乜料到，係到上季以自由身投諾域治踢英冠先大爆發，於各項賽事入足46球，雖然係次級聯賽，但呢個數字亦足夠令人震驚。

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。