【賽後解碼】文尼沙拿大和解拍住上贏波

20190914
東網電視
更多新聞短片
(法新社圖片)
歐聯大戰前夕,利物浦贏得有驚無險。尋晚英超早場主場出擊嘅紅軍,雖然早段一度落後對手紐卡素,好在有沙迪奧文尼挺身而出,帶領球隊吹響反擊號角,最終紅軍靠塞内加爾前鋒個人梅開二度,同穆罕默德沙拿錦上添花,以3比1反勝「喜鵲」,成功延續聯賽全勝走勢。
賽前英超官方公布8月最佳領隊,帶領利物浦聯賽開咧豪取4連勝嘅領隊高普,當然眾望所歸攞獎,至於該月最佳球員獎,就由開咧4場英超交出5個入波同1次助攻嘅諾域治射手迪姆普基奪得。
領隊攞獎咁開心,梗係要賀一賀佢,尤其紅軍下周中即將於歐聯登場面對小組勁敵拿玻里,利記肯定希望乘住聯賽勇態出征。不過今場正選收起羅拔圖法明奴同佐敦軒達臣兩大主力嘅紅軍,開局反而令領隊高普嚇出一身冷汗,比賽早段遭紐卡素後衞積祖威廉斯靠一次反擊偷襲得手,仲有奧歷治因傷退下火線,好彩利物浦焗住換入法明奴之後即刻弗返,先有沙迪奧文尼完上半場前連入2球,幫助紅軍反超比數,再有穆罕默德沙拿錦上添花埋齋,最終利物浦以3比1贏波,聯賽豪取5連W繼續做全勝之師。
最緊要一點,文尼同沙拿之前曾經因為爭入波面阻阻,依家喺球場繼續合作無間,齊齊有好發揮,「紅軍」嚟緊肯定會愈踢愈好。
立即參加「賞您睇」: https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。