列貝利仲有貨賣　意甲開齋破紀錄靚成咁

法國球星列貝利今夏出走拜仁慕尼黑，轉去意甲效力費倫天拿，尋晚佢代表「紫百合」出訪阿特蘭大，結果射入佢加盟後首個聯賽入波，證明自己仲好踢得。佢仲以36歲168日高齡，打破咗意甲史上聯賽射入首個入波最年長外援紀錄，認真巴閉呀！

場波最後打和2比2，列貝利雖然做唔到贏波功臣，但至少呢個入波都係堅靚嘅。話說場波踢到65分鐘，費達歷高基艾沙喺右路大腳傳中，後上殺入禁區嘅列貝利第一時間左腳「窩利」射入，盡見功架呀！

入波之後，見到列貝利興奮跪地慶祝，依然仲好好火。唯一可惜係費倫最後被逼和失分，開季4戰只得2和2負，成為意甲唯一未贏過波球隊，睇嚟列貝利仲要再努力，否則到時要降班，就肯定賴佢黑腳呀！

立即參加「賞您睇」： https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。