打比郡恐怖車禍 隊長重傷 兩國腳被捕

20190927
東網電視
更多新聞短片
英冠球隊打比郡驚爆超級噩耗,陣中3大主力捲入醉駕醜聞並發生嚴重車禍,隊長基奧治喺意外入面嚴重受傷,手腕骨折以及膝部重創,宣布今季提早收咧。同車另外2位球員分別係威爾斯國腳湯馬士羅倫斯同前英格蘭U21國腳美臣賓納特,佢哋都被警方控告醉酒駕駛,消息指兩人並冇嚴重受傷。
打比郡日前舉行球員聚餐後,基奧治、湯馬士羅倫斯同美臣賓納特再有第2場,而且更有飲酒,又拒絕使用球會提供嘅接載專車,結果真係出事。佢哋坐湯馬士羅倫斯嘅Range Rover同其他車相撞後,再炒埋路邊燈柱,車頭撞到爛晒,坐喺後座嘅隊長基奧治就傷得最甘,球會證實佢今季提早收咧,另外兩位球員則被檢控醉酒駕駛,10月15號將要上庭。
打比郡領隊高古表示,基奧治現時情緒非常低落,而且覺得自己需要負上部份責任,網上亦流出佢撞車至醉到啤啤夫嘅片段,呢位33歲愛爾蘭中堅係球隊隊長,今季每場賽事都正選上陣,喺佢養傷期間,侯度史東將會接任隊長。至於湯馬士羅倫斯同美臣賓納特,打比郡表明會進行內部調查,但強調會幫助2人改過自身、重返球隊。打比郡周六(28號)英冠將主場迎戰伯明翰。
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。