港超聯　翟廷峯大個仔娶老婆啦！

上季協助和富大埔贏得港超聯冠軍的功臣之一、今季隨「堅Sir」轉投東方龍獅的翟廷峯，將於下月（11月）4日迎娶拍拖兩年的女友Ceci，榮升「人夫」。恭喜晒喎！

雖然有點老土，但用「千里姻緣一線牽」來形容「廷峯」與Ceci，卻最貼切不過。「我同Ceci係喺一個朋友聚會嗰度認識嘅，佢本身喺美國生活嘅，嗰次係返嚟渡假，喺個聚會度我哋都有傾吓偈，但傾得最多電話係佢返番美國之後，我哋乜都傾，好啱Key。之後佢再返嚟，我哋就約出嚟行街食飯睇戲，跟住就一齊咗喇。」

那麼11月4日是兩人的特別日子嗎？「咁又唔係喎！擇日話呢日好日咋，哈！哈！」結婚乃人生大事，身為「好兄弟」自然會力撐，好像隊友李嘉耀正是「廷峯」其中一位「戥穿石」：「仲有梁興傑、陳文輝同黎耀昌，我哋好細個就識，感情好好，多謝佢哋咁幫手。」

成家立室後，除要好好照顧家庭，還要加倍努力工作。「無錯呀！球隊個頭開得咁好，希望最後可以成為聯賽冠軍，我貪心啲，可以捧埋盃賽就好喇！」「準新郎哥」翟廷峯謂。