為咗呢個神鋒　皇馬舉債2億歐元搶人

球季開咗至個幾月，皇家馬德里會長皮里茲似乎已經諗家下一步，準備向外舉債2億歐元，主要目的係撬熱剌牆腳，簽晒哈利卡尼、基斯甸艾歷臣，來季重新打造一支攻擊力更強嘅「銀河艦隊」！

據西班牙《Don Balon》報道，如果皇馬持續鋒線不濟，皮里茲就會走去借2億歐元，收購英格蘭國腳哈利卡尼，同賓施馬拍檔。消息話皮里茲咁Like哈利卡尼，原因係佢由領導能力、決心到經驗都冇得頂，尤其入波多最難能可貴，所以皮里茲不惜孭大筆債買佢，令呢個球星超越夏薩特、加里夫巴利兩個，成為「銀河艦隊」史上最貴嘅收購。

皮里茲將獵食箭頭對準熱剌，據報係睇見呢支英超球隊今季謝謝哋，未必入到前4名，下季冇得玩歐聯，領隊普捷天奴季尾可能冇癮走人，到時哈利卡尼見恩師都劈炮，好大機會萌生離意，而且丹麥中場基斯甸艾歷臣又將回復自由身，唔使點燒錢就買到，可以集中銀彈簽「哈利仔」。

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。