【有片】神級教材！馬體會示範咩叫全體防守

西甲勁旅馬德里體育會向來以防守聞名世界，教練施蒙尼堪稱係「防守之鬼」，雖然今季經歷防線大換血，但防線穩健程度絲毫未見削弱，周三(2號)歐聯2比0輕取莫斯科火車頭，係球隊連續第4場賽事保持不失，而且喺比賽期間，更加驚現一幕教材式嘅防守示範，令球迷歎為觀止！

當時馬德里體育會進攻斷纜，被莫斯科火車頭快速反擊，原本馬體會後場只得2個球員防守，不過眨眼間見到6個黑衫球員一字排開咁全速衝刺回防，畫面就好似睇緊奧運100米短跑衝刺咁，最終當然成功化解危機。

呢段影片喺網上瘋傳，大批網民激讚馬體會防守訓練有素，完美示範乜嘢叫做「全體防守」。施蒙尼，真係要寫個「服」字畀你！

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。