美斯死亡筆記 基沙文下季換尼馬!

20191005
東網電視
更多新聞短片
(互聯網)
基沙文等咗2季終於轉投巴塞,但呢名法國前鋒,下季或者已經唔再係巴塞球員!無論你喺巴塞定阿根廷國家隊,首要任務就係要同美斯打好關係,但基沙文明顯做唔到呢一點。據西班牙傳媒表示,美斯已向領隊華維迪施壓,希望將基沙文貶為後備;法國媒體Le10sport亦報道,巴塞有意於下個夏天,用基沙文作談判籌碼向巴黎聖日耳門力斟尼馬。
巴塞今夏引入基沙文,不過呢名世界盃冠軍成員於巴塞表現麻麻,落場9次只取得3個入球,據西媒爆料,美斯對呢位前線新拍檔並不滿意,希望華維迪用番奧士文尼迪比利打正選,配合佢同蘇亞雷斯於前線搵食。
美斯雖然表面上和藹可親,但唔少傳言都指佢只同老友合拍,蘇亞雷斯同佢私底下非常老友,故於賽場上亦都配合得如魚得水;相反基沙文則同美斯冇兩句,前者亦都公開承認,同美斯冇乜偈傾,因為「兩個都係並非健談之人」。於歐聯鬥國際米蘭嘅賽事入面,美斯同基沙文之間嘅互相傳球只有5次。
Le10sport報道,美斯好想尼馬回歸巴塞,巴塞為遷就呢名王牌,已部署搵基沙文做籌碼,希望同巴黎聖日耳門完成收購尼馬嘅交易。尼馬早已公開表示想回歸魯營,PSG恨不得佢即刻走人,基沙文係法國國家隊正選前鋒,同基利安麥巴比合作無間,PSG絕不介意接收基沙文,但當然要睇巴塞肯補貼幾多嚟換尼馬。
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。