爭咩吖爭　最後咪又係勒夫話事囉

德國國家隊正選門將之位爭鬥，近月鬧得相當激烈！巴塞隆拿嘅達史特根一直覺得自己得唔到公平機會，開火炮轟，而拜仁慕尼黑門神紐亞就認為達史特根說話影響球隊團結。拜仁會長漢尼斯早前加入戰團力保紐亞，不過今日德國隊領隊勒夫就鍾意開腔，為正選位置一錘定音！

勒夫話：「擁有兩名高水平門將，唔會令我哋難受，只會令我哋開心。我已經講過，紐亞係我哋隊長，佢會繼續喺歐國外擔正。如無意外，佢會係我哋No1。」勒夫之後再補充：「我已經同兩名門將傾過，我哋會畀達史特根喺對阿根廷嘅熱身賽擔正，然後紐亞喺對愛沙尼亞嘅歐國外做正選。」即係話，話知你達史達根喺巴塞踢到識飛，都係乖乖哋做後備啦！

立即參加「賞您睇」： https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。