【東體爭議】熱刺絕路　前主席求雲格出山

熱刺喺英超作客慘吞白禮頓3強，近2場比賽狂失10球，領隊普捷天奴備受壓力，雖然呢位阿根廷主帥賽前豪言「至少教多熱刺5年」，但連場慘敗已經令民意逆轉，英格蘭前國腳祖高爾就話：「熱刺已經亂晒龍，冇鬥心、冇壓逼、乜嘢都冇，普捷天奴喺場邊亦冇毫無朝氣，我覺得呢隊波同呢個領隊已經走到絕路，點都要作出轉變。」

前熱刺主席蘇加向來係敢言之人，正當前阿仙奴領隊雲格公開證實收到國際足協斟介，希望佢出任技術官員，而且仍然未決定係咪放棄做領隊之際，蘇加就喺twitter呼籲雲格「嚟教熱刺啦！」當然呢個只係蘇加一廂情願，如果雲格真係轉教阿仙奴死對頭熱刺，相信會係足球史上最大嘅「背叛」。

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。