拒曼城新約　利萊辛尼經理人密會神秘仁

今季因傷長抖嘅曼城快翼利萊辛尼，據報近排拒絕咗曼城開出嘅1,200萬歐元年薪，同時間，辛尼嘅經理人仲同德甲拜仁慕尼黑嘅顧問巴蘭捷尼密會商討，睇嚟下季見到辛尼着起拜仁波衫絕對不是夢呀！

利萊辛尼有幾好波？都唔使多講，近兩季佢喺曼城都錄得入波同助攻嘅「雙雙」。之前「藍月亮」一直想同佢續約，仲開到1,200萬歐元年薪，不過有傳辛尼唔滿意呢個數，因此拒絕咗續約。再者，拜仁早喺今年夏天已經積極斟介過辛尼，仲話肯開到2,000萬歐元年薪，只係因為後者喺季前賽突然受重傷，先至令交易告吹。

根據德國《圖片報》最新消息，拜仁顧問巴蘭捷尼上星期已經同辛尼經理人加德納秘密會面，似乎有唔錯進展。消息話，拜仁將會向曼城開價1億歐元轉會費，到時又睇吓曼城肯唔肯放人啦！

立即參加「賞您睇」： https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。