【CBA】林書豪首演轟40分　都係要輸！

今夏結束9年NBA生涯、轉戰CBA加盟北京首鋼嘅林書豪，周四(10號)晚為新球隊首度喺正式比賽披甲出戰季前賽，大發神威個人獨取40分，可惜佢嘅隊友唔爭氣，北京首鋼最終仍以91比94事畀浙江廣廈。

呢位美籍華裔控衛喺CBA屬「超班」，月初喺北京首鋼自己搞嘅熱身賽上陣已經拎到21分，今場首次喺官方比賽上陣，上半場已經攻入17分，下半場更加瘋狂搶多23分，最終全場18次起手命中13次，交出40分、6籃板、3助攻同1偷波成績。

雖然數據非常「靚仔」，不過林書豪賽後就話自己仲有好多問題要改善：「我覺得自己體力仲唔係咁好，仲需要一啲時間。」林書豪亦表示自己同隊友默契未係好好，但相信只要多啲時間磨合就可以解決。

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。