未做球王 尼馬先做玻璃之王

20191015
東網電視
更多新聞短片
(Getty Images)
巴西球星尼馬被譽為新一代「森巴兵團」最出色球員,不過距離要做球王,始終都仲差多少。近年佢絕對係麻煩多多,被指經常插水,又因為扭計轉會搞到神憎鬼厭,日前佢代表巴西出戰尼日利亞,左腳大腿肌腱意外二級拉傷,嚟緊要休戰4周。有傳媒幫佢計過,話佢自從2017年加盟巴黎聖日耳門至今,已經夾夾埋埋傷咗接近一年。家陣未做球王,尼馬可以先做「玻璃之王」,事關佢個身體似係玻璃一樣咁化學呀!
尼馬嚟緊休戰4周,將會錯過4輪聯賽,包括對尼斯、馬賽、迪安同比斯特。喺歐聯方面,PSG兩鬥布魯日都會冇佢份,假如佢可以如期復出,算係有機會趕上11月27日PSG對皇馬場波。睇番尼馬加盟PSG後嘅傷病史,原來由2017年加盟至今,呢位巴西球星已經養傷咗322日,到依家再加上一個月先好番,尼馬喺PSG養傷日就會增加到352日。換句話講,尼馬加盟PSG兩年幾,但就休戰接近一年,而單計缺席場數的話,連同未來一個月計,就已經缺席咗51場,你都咪話唔誇張呀!
另外,西班牙《每日體育報》仲幫尼馬計算佢嚟到歐洲之後嘅傷病史,原來佢過去6年間受傷咗有16次,其中最嚴重3次受傷,都係發生喺近兩年入面。舊年二月佢右腳第5跖骨骨折,抖咗90日。今年一月,尼馬第5跖骨又再次骨折,再抖咗85日,到今夏美洲盃熱身賽,尼馬右腳足踝韌帶斷裂,然後又抖90,家陣尼馬唔止係玻璃腳,簡直係玻璃人,傷多過踢呀!
立即參加「賞您睇」: https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。