寸王有着落？法媒爆呢支歐聯份子搵佢傾緊

前曼聯領隊摩連奴去向一直受人關注，早前有傳有法甲球會搵佢傾，但據聞「寸王」一直堅持非英超球會不教，要喺邊度跌低就邊度起番身！今日，根據法媒《soccer link》爆料，原來英超勁旅熱刺已經秘密同摩連奴聯絡，傾緊一旦熱刺辭退普捷天奴，就會即刻搵佢接手呀！

事實上，熱刺自從上季歐聯決賽不敵利物浦之後，主帥普捷天奴據聞因為人工問題，曾經同球會鬧不和。加上今季開季以來，熱刺表現唔多對辦，依家踢完8輪只能排第9，家陣英國博彩公司已經將普捷天奴列為下位英超被炒領隊大熱，仲熱過曼聯領隊蘇斯克查添！

當然，報道話熱刺暫時仲未係一定炒硬普帥，但如果球隊持續低迷，換帥都係勢所難免，所以管理層依家已經開始咗同摩帥接觸，唔想到時亂晒龍喎！

立即參加「賞您睇」： https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。