雲格復出重返日本　2022世界盃預埋佢！

前阿仙奴主帥雲格快將重出江湖，擔任日本足協顧問或技術總監職務，希望喺明年東京奧運、2022年世界盃大展拳腳！

日本足協幾個消息來源均確認真有其事，事實上現年69歲嘅雲格，舊年俄羅斯世界盃期間就同日本足協會長田島幸三傾過。呢位法國名帥早喺1995至96年曾經執教名古屋鯨魚（當時譯八鯨），領軍贏得日皇盃，被認為熟知日本球圈，極受日本足協睇重。

「雲爺爺」上個月同日本大型藝人經紀公司、電視節目製作公司吉本興業簽咗經理人合約，呢間公司旗下除咗藝人，仲有唔少體育明星，例如川崎前鋒攻擊球員齋藤學、畀神戶勝利船外借福岡黃蜂嘅後衞初瀬亮等足球員，雲格簽約冇耐就傳出咁嘅消息，唔似係吹水嘢，何況簽約儀式上佢仲咁講過：「我返到東京，真係好高興，我期待住喺日本足球界再次同大家見面。」

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。