【人物誌】久保建英老竇 4招育成天才

20191020
東網電視
更多新聞短片
「日本美斯」久保建英協助馬略卡打破皇馬不敗身後,唔少皇馬球迷都大嘆施丹「走寶」,唔將呢位天才新星留為己用。久保建英點解可以咁能人所不能?久保家4大「家規」,睇嚟係成功要素!
久保建英嚟自神奈川縣川崎市麻生區一個4口之家,弟弟久保瑛史細佢6年,踢緊橫濱水手下屬嘅少年隊,依家入埋皇馬少年隊,傳聞一樣好好波,甚至有人認為佢「才能超過阿哥」。一門雙傑,似乎唔可能出於偶然,家庭教育、父母薰陶必然係佔有重要地位。
佢爸爸久保建史49歳,築波大學體育専業畢業,目前任職屋宇設計公司MISAWA HOMES,擔任總務及人力資源部長兼BR業務流程改革推進辦公室主管,年薪超過1000萬日圓(約72.7萬港元) 。曾經踢過業餘波,又教過細路仔嘅佢,當久保建英3歲竟正式指導佢踼足球。雖然工作繁忙,放工嗰時個仔已經瞓咗,久保建史每日朝早返工前,一定早起陪個仔踢一陣波,一年有350日如是。喺好多人眼中,咁代表住父愛,斷言愛可以育才。但任何愛都有界限,過咗頭就係一種溺愛。
久保建史2012年出過一本書《我進入了巴塞!》 ,講述佢點樣培育久保建英,書中除咗提及一切其實由尋求樂趣開始,主要披露咗久保家4大「家規」。佢兩夫婦對囝囝嘅教育方式,稱唔上係怪獸,只係香港人未必有條件、有意願有樣學樣,只不過對於一啲想做星爸星媽嘅,唔知會唔會有啟發作用呢?
久保家「家規」1:生多個細路
無論體育界、藝能界都好,成功人士多出自唔只一個仔女嘅家庭。以久保建英雙親為例、父親久保建史係大仔,母親就係二女。喺好多情況底下,第二個囝囝經常會輸畀哥哥,哥哥以至佢啲朋友都唔會太遷就佢,於是就會設法追上兄長一輩,形成互相追趕心態。久保夫婦嘅政策係希望囝囝心志堅定,而且堅信「男仔要有良好嘅運動神經建立自信」。
久保家「家規」2:屋企唔好太舒適
傳聞係東京大學畢業嘅久保媽,每當喺屋企看到兩個仔嘅時候,佢總係講:「到屋外面玩。」,因為佢兩夫妻奉行「屋企唔好太舒適,去外面玩」嘅原則。唔只係咁,仲要令兩個細嘅覺得屋企唔舒服。為乜?就係要培養囝囝嘅獨立性,久保建英喺幼兒園時代,已經積極參與足球隊活動同宿營,上小學之前,佢仲有過獨自住喺朋友屋企過夜嘅經歷。
久保家「家規」3:赤腳玩
據講久保家有個不成文規定,細路喺外面玩耍嗰陣,可以任佢哋赤腳走嚟走去。一啲育兒書都支持呢種論調,認為對腳嘅刺激有利小朋友嘅成長。久保家似乎一樣意識到要赤腳,鍛鍊佢哋嘅軀幹同腳嘅觸感。仲有係,屋企總會有個波喺度,創造一個可以隨時踢波、熟習波嘅環境。呢一點似乎同比利年代唔少巴西球星,都係赤腳玩街波長大一脈相承。
久保家「家規」4:睇書訓練想像力
父親久保建史認為,閱讀能夠提高溝通能力和思維能力。屋企有400多本圖畫書,兩個囝囝每星期閱讀幾十本咁多。由於養成良好嘅閱讀習慣,久保建英依家係自己主動睇書。事實由小學時期至去到西班牙拉馬西亞受訓,佢都表現出強大嘅求知欲,慣咗「立即學習我唔理解嘅嘢」。
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。