熱刺救兵到！普捷天奴契仔傷愈復出

熱刺今季成績走晒樣，近7場只有1勝，上輪歐聯更加以2:7慘敗畀拜仁慕尼黑，上場英超對包尾嘅屈福特亦贏唔到，令人懷疑熱刺嚟緊周三(23日)凌晨歐聯主場對貝爾格萊德紅星，能否全取3分。

好彩熱刺收到一個好消息，就係中場盧施素已經傷愈，今場可望復出。領隊普捷天奴今夏幾經努力，先至向貝迪斯借用到呢位阿根廷同胞，點知佢喺9月初為阿根廷踢熱身賽對智利，勇戰受傷後一直缺陣，打亂普帥部署。

盧施素可以勝任中前場多個位置，佢喺上季西甲有9球進帳，熱刺有番盧施素助陣，應該可以改善近期疲弱嘅攻力。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。