【東體爭議】利物浦反足球踢法主宰未來?

20191025
東網電視
更多新聞短片
(Getty Images)
足球世界戰術變化萬千,有時會有新戰術誕生稱霸球壇,有時又會有舊戰術復興,雄霸世界。近年由巴塞隆拿到曼城帶起嘅高位逼搶加傳控足球,踢法賞心悅目兼有效率,勁受球迷歡迎,亦有唔少球隊嘗試模仿。不過根據英超般尼領隊戴治所講,利物浦踢嘅長傳急攻「反足球」踢法,將會喺未來主宰球壇,你哋又認唔認同大腳長傳係贏波皇道?「紅軍」踢嘅進攻足球,又係咪只係大腳長傳咁簡單呢?
事實上,由戴治帶領嘅般尼,依家都係嘗試模仿利物浦去踢呢類長傳急攻足球,仲要唔少名帥都話唔易防範添!戴治話:「你唔會教班12歲以下球員去踢短傳小組配合嘛,嚟緊好快足球比賽會再由長傳球主導。英格蘭名將荷度係我見過最出色嘅傳波高手,但喺現代足球,如果個球員兩隻腳都係大炮,唔通你會同佢講,『對唔住,我只想你踢出10碼短傳』?我唔知點解要咁囉!」
咪以為戴治得把口亂吹,佢引用咗利物浦喺上屆歐聯決賽,點樣用長傳制勝:「試睇吓上季利物浦喺歐聯決賽傳球數據,佢哋傳球成功率係67%,成場波佢哋只傳280腳,但係呢種『反足球』踢法贏咗歐聯冠軍,而嗰場波敗方熱刺傳球係達到500次囉!」
般尼同利物浦今季都係鍾意用長傳進攻嘅球隊,強如曼城近年對住般尼都有時陷於苦戰,哥迪奧拿曾經講過:「般尼嘅長傳衝撞踢法好難防守,佢哋嘅球員比我哋高,第二點嘅爭搶都好勁,我哋必須加強對呢類球隊嘅防守。」就連熱刺領隊普捷天奴都一樣驚驚:「般尼踢法好簡單,但你想要好似佢哋踢到咁簡單同高效其實好難,佢哋嘅長傳球運用合理,而且幾個高佬都可以爭第2點!」
普帥咪講出重點囉!你估一句長傳大腳就好容易?如果好易,就隊隊都利物浦啦!至於長傳係咪最有效,大家唯有放長雙眼睇啦!
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。