神龍上身！麥巴比成5大聯賽「造球之王」

周一(28日)凌晨法甲，巴黎聖日耳門(PSG)主場對馬賽，出現特別一幕，PSG球迷製作一幅日本漫畫《龍珠》神龍圖像，掛喺觀眾席上，似足集齊7粒龍珠，召喚出神龍，準備許願。

「7粒龍珠」上都有個數字，代表PSG之前捧法甲冠軍嘅年份，但PSG其實捧過8次聯賽冠軍，可能遷就「7粒龍珠」，少咗上季2019年。神龍助威之下，PSG上半場已經入4球，最終亦以4:0大勝馬賽，基利安麥巴比、莫路伊卡迪各自梅開二度。其中麥巴比今季法甲已經入4球及3次助攻，如果以2019年計算，佢今年法甲已累積入24球及6次助攻，換言之創造30個聯賽入球，屬於2019年歐洲5大聯賽「造球之王」，認真犀利。

PSG已拋離第2位南特8分，唔使召喚神龍許願，都應該可以再次捧盃，但呢支法甲豪門最想都係捧歐聯冠軍，呢個願望可能就要靠神龍幫手。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。