保方永恆！又改口想續約至2021年

41歲意大利門將保方今季重返祖雲達斯，甘願擔任後備，原本只係為打破AC米蘭傳奇人物馬甸尼嘅902場意甲上陣紀錄。保方依家已經達到目標，超越咗馬甸尼，照計佢踢完今季就會退休。

不過，意大利《都靈體育報》訪問完保方，先至知佢又改變主意，保方話：「我想繼續踢落去，而唔係擔任球會體育總監，我並唔急於做決定，等同老闆傾完再做決定。」據悉保方希望續約1年至2021年，意味佢到43歲仲可能喺意甲上陣。

保方喺今季9場意甲，都有3次正選上陣，其中對博洛尼亞一戰，更於補時救出對手必入球，技驚四座，幫祖記力保2:1勝果，可能因為呢1次撲救，令佢覺得仲可以再踢多1季。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。