美斯左腳入500球　巴塞輸波仲排榜首

周日(3號)西甲出現唔少意外賽果，巴塞隆拿作客利雲特有美斯上半場射入12碼領先，勢估唔到下半場61分鐘至68分鐘經歷「黑色8分鐘」，連失3球下反輸1比3，仲有烏拉圭前鋒蘇亞雷斯傷出，真係賠了夫人又折兵！美斯今場入波，係佢為巴塞隆拿第500次用左腳入波，即係佢巴塞總入球(609球)當中嘅82.1%，可惜「黃金左腳」都救唔番佢哋。

賽後利雲特官方Twitter鋪咗張Google搜索頁面截圖，內容係「7分鐘內能夠做到乜嘢？」，居然全部都係昨仗利雲特主場7分鐘內連入3球逆轉巴塞場波，寸到爆炸！今次亦係巴塞近兩年嚟，第三次輸畀利雲特（2018年5月14日利雲特5比4勝巴塞；2019年1月11日利雲特2比1勝巴塞），又唔怪得佢哋咁囂。

唯一慶幸嘅係，巴塞隆拿輸波後仍然排喺榜首，事關皇家馬德里尋日主場只能夠同貝迪斯悶和0比0，第3、4位嘅馬德里體育會同西維爾交鋒又打成1比1平手，令巴塞隆拿得以保住個「一哥」位。不過，CF格蘭納達周一主場只要贏皇家蘇斯達，就可以取代巴塞隆拿升上榜首。