拜仁官宣炒高華 摩連奴雲格爭崩頭!

20191104
東網電視
更多新聞短片
(互聯網)
拜仁慕尼黑怒炒尼高高華,摩連奴、雲格係新帥人選大熱門!德甲班霸拜仁,於剛過去周六德甲1:5慘敗於法蘭克福腳下,球隊3大巨頭路美尼加、漢尼斯同沙利咸美迪錫急召主帥高華開會,最終決定辭去呢名教頭職務。自舊年年尾被曼聯炒魷後,摩連奴仲未搵到新工,佢一直都等緊最教班霸嘅機會,但佢要如願以嘗,先要問過雲爺爺先!
高華由上季開始執教拜仁,雖然帶領球隊成國內雙冠王,但於德甲贏得好險,失去以往霸氣,而且又於歐聯完敗予利物浦出局。到本季拜仁亦失分頻頻,迄今10戰只得5勝3和2負成績,高華剛啱面對前球會法蘭克福輸5個1皮,對拜仁嚟講如此劣績絕對唔可以接受,故高層有咁嘅決定,絕不令人意外。高華表示:「對拜仁嚟講,呢個係個正確決定。近日戰果以及實際表現,令我得到呢個結果。我同羅拔高華多謝拜仁呢1年半以來嘅照顧。」
摩連奴於賦閒期間,有唔少球會向佢招手,有中超更向佢提供天價合同,但都畀寸王一口拒絕,因為佢好希望可以再教富豪球會。早前佢曾向傳媒透露學習德文,同傳出多蒙特有意搵佢執教。依家拜仁帥位懸空,摩連奴當然流晒口水,不過德媒就表示,雲格同前祖雲達斯教頭阿里基,都係拜仁招手目標,究竟摩佬能否如願以嘗,就要睇拜仁最終決定喇。
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。