阿仙奴候任新帥3揀1 兩個舊將你點揀?

20191104
東網電視
更多新聞短片
(Getty Images/互聯網)
英超阿仙奴自從舊年夏天有名帥雲格離隊,改由艾美利領軍後,戰績未見提升,甚至不進反退,近排就傳得好激,話「兵工廠」計劃短期內戰績冇改善的話,隨時會炒埋艾帥。至於會搵邊個頂上?上星期就傳出過可能搵摩連奴,不過阿仙奴高層已經公開否認,今日,就傳出「兵工廠」已經鎖定三大候選人,包括兩名舊將韋拉同阿迪達,仲有一個就係名帥阿里基,各位「廠迷」又會點揀先?
對於上星期英國《泰晤士報》指,阿仙奴總監辛尼爾同名帥摩連奴一齊睇阿仙奴場歐霸盃,賽後仲一齊食飯嘅報道,據聞阿仙奴高層已經公開否認事件。事實上,英媒都認為,以「寸王」以前帶領車路士同曼聯期間,同「兵工廠」及雲格勁多牙齒印,「廠迷」唔會歡迎佢嚟執教。至於真正有機會頂替艾美利人選,依家就有三個。
據知,其中兩個候選人都係前阿仙奴隊長,分別係韋拉同阿迪達,其中韋拉依家喺法甲教緊尼斯,上季呢班波拎到法甲第7,唔失禮,今季就反而下滑少少,依家排緊13位。至於阿迪達退役之後,就去咗曼城做助教,跟名帥哥迪奧拿搵食。事實上,哥帥今年已經多年公開讚賞阿迪達嘅教波功力,講到底,阿仙奴喺簽艾美利之前,都有諗過搵阿迪達,就知搵佢教根本完全唔出奇。
最後一位候選人則係前祖雲達斯名帥阿里基,之前一直有傳佢好想挑戰英超,就喺同阿仙奴扯上關係之前,連曼聯都據聞有興趣搵佢。不過點講都好,艾美利今鋪睇嚟都非走不可,事關早前有多達5萬5千名球迷參與咗個網上投票,結果有多達88%球迷想艾美利落台。依家《鏡報》話阿仙奴會畀多一個月時間佢,如果球隊戰績再冇起色,到時就會正式炒人換帥囉!
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。