曼聯1月勢簽利物浦舊將 肯定激死利迷

20191105
東網電視
更多新聞短片
(互聯網)
唔少球評家都認為,曼聯需要5、6個轉會窗先可以重組金鑽陣容、再次挑戰英超冠軍,領隊蘇斯克查亦心知呢一點,故此每個轉會窗佢都會把握時間買人。英國《太陽報》報道,1月曼聯將簽入祖雲達斯雙星,其中文迪蘇傑勢將加盟,另外紅魔亦對前利物浦中場安利簡恩好有興趣,如果成事的話,他日呢名德國球星重返晏菲路時,必定受到利迷「熱情招待」。
曼聯現時最大問題,係中前場人手唔夠,雖然安東尼馬迪爾已經復出,同拉舒福特拍檔攻堅有一定睇頭,但蘇帥認為始終要增加人手、要引入一名正前鋒增強攻力。文迪蘇傑於祖記已經冇得踢,雖然於卡塔爾有球會希望其加盟,但曼聯對呢名克羅地亞世界盃亞軍成員依然有吸引力,故入魔成數高唱入雲。
另外球隊自安達靴里拉離隊後,始終未有替補人手,安利簡恩絕對合乎要求。呢名25歲德國國腳,本季於「斑馬兵團」出場時間極少,甚至未被領隊沙利擺入歐聯名單,早已非常不滿,故此唔介意離隊回歸英超。安利簡恩係中場多面手,而且又能踢右閘,對蘇帥調動好有幫助。安利簡恩曾效力利物浦4季,於聯賽上陣115次入10球,其中於17年佢對屈福特射入嘅倒掛更加令利迷拍爛手掌。到佢於18年以自由身轉投祖雲達斯,唔少利迷耿耿於懷,如果佢再轉投曼聯,肯定再一次令利迷痛到入心。
立即參加「賞您睇」: https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。