基亞利殊條款　曼城捧盃維拉有錢分？

足球博彩神器，每日重心提供盡在《彩報》：http://win.on.cc/football/　

曼城同利物浦嘅英超爭霸，要喺煞科戰定生死，當所有球迷都買定花生，等睇「紅軍」傳奇謝拉特點樣帶領阿士東維拉阻止曼城，有消息指原來曼城如果順利奪冠，維拉將可以透過基亞利殊嘅合約條款，得到1,500萬鎊獎金！謝拉特會要感情定要獎金？

曼城依家領先利物浦1分，煞科戰只要主場贏維拉就可以衛冕，維拉領隊謝拉特嘅「紅色背景」，令人相信佢會盡力阻止曼城奪冠，但前曼城球星米卡李察士喺《Talksport》節目爆出驚人消息：「謝拉特會想幫助利物浦捧盃，不過維拉喺賣走基亞利殊嘅合約中有個條款，只要曼城奪冠就會啟動，獎金係1,500萬鎊，而足球呢門生意一向係金錢第一。」

維拉喺去年夏天以1億鎊轉會費賣基亞利殊去曼城，當中包含多項浮動條款，需要附合條件先至會啟動，贏英超冠軍就係其中之一，呢種做法喺現今球壇係常見做法，所以唔會違反英超條例。