車仔中FIFA病毒　芝維爾受傷難鬥般尼

今季飽受傷兵問題困擾嘅車路士，又增添「十字兵」，左後衞芝維爾早前為英格蘭出戰熱身賽對巴西及比利時之後受傷，可能缺陣周六(30日)晚英超主場對般尼。

芝維爾近2場國際熱身賽都以正選上陣，其中上仗對比利時，更加踢足全場，但呢位27歲左閘返回車仔之後，被驗出膝部受傷，領隊普捷天奴話：「需要觀察部份球員情況，例如芝維爾踢咗2場國際熱身賽後，膝部有傷，唔可以操練，佢能否踢周末聯賽，仍然係未知之數。」

車路士目前傷兵已經增至9人，包括尼干古、羅拔山齊士、列斯占士，以及日前宣布提早收咧嘅中場羅美奧拉維亞。