皇馬隊長今夏離隊　18歲新星或成接班人

根據「轉會權威」記者羅曼諾(Fabrizio Romano)爆料，皇馬隊長拿祖費南迪斯已經通知會方，今夏約滿之後唔會續約，將以自由身離隊，「銀河艦隊」計劃收購里爾18歲中堅約羅填補拿祖費南迪斯嘅位置。

現年34歲嘅拿祖費南迪斯出身於皇馬青訓系統，2011年出道以來一直效力「銀河艦隊」，賓施馬上年夏天離隊後，拿祖接任隊長。由於皇馬往往只會向老將開出1年續約條件，呢位西班牙國腳希望獲得較長合約，寧願選擇轉投其他球會。

據悉國際米蘭有意簽入拿祖費南迪斯，事實上，國米上年夏天已經嘗試遊說拿祖加盟，但未能成功，今次有機會成事。

隨住拿祖費南迪斯將會離隊，皇馬睇中里爾中堅約羅作為接班人，呢位18歲法國新星身高1米90，今季為里爾上陣39場入3球，估計身價達4,000萬歐元(約3.3億港元)。