阿仙奴及時雨　「被遺忘的人」復操

阿仙奴今季傷兵滿營，國際賽期間又有後衞賓韋特做手術，預計要抖2至3個月時間，不過球隊周三(20日)操練就有「生面口」出現，蘇格蘭國腳基蘭泰亞尼養傷5個月後終於復操，有望成為阿仙奴嘅及時雨。

基蘭泰亞尼自從歐國盃大腿嚴重拉傷後，近5個月一直養傷，而且佢上季被外借去皇家蘇斯達，對上一次為阿仙奴上陣，已經係上年8月嘅社區盾，幾乎被遺忘佢仲係阿仙奴球員。27歲嘅基蘭泰亞尼周三正式復操，對於未來1個月都要1周雙賽嘅阿仙奴嚟講，無疑係及時雨。

喺賓韋特要長抖情況下，祖利安添巴同卡拉科利預料會擔任兩閘正選，富安健洋、辛真高同基蘭泰亞尼就會競爭後備位置。有傳基蘭泰亞尼可能會喺1月離隊，最有機會重返母會些路迪。