摩連奴因健康問題暫離土耳其　仲要做手術

費倫巴治踢完今輪土超後，據報主帥摩連奴因健康理由將會離開土耳其，到外地接受手術，等佢番嚟後再集合，應付下半季比賽。

土耳其傳媒報道，61歲嘅摩dad將會暫時離開球隊，到外地做手術，至於佢身體出現咩毛病就冇提到，全隊亦會放假一星期，等摩帥回歸後重投操練，費倫巴治下場比賽將在明年1月5日舉行。

「寸王」今夏入主費倫巴治，半季成績屬於中上，現時在土超排第2，多踢1場落後榜首加拉塔沙雷5分，歐霸盃6戰2勝2和2負，仍然處於附加賽區域。

摩連奴執教費倫巴治半季以來，仍然不改其出位性格，曾在一場土超賽後大發牢騷，形容土超黑暗冇人睇，仲話「早知唔嚟土超」。

此段時間有關摩帥重返英超傳聞不絕，亦有同佢昔日門生、現任曼聯主帥魯賓艾摩廉互動，不過無論佢去邊度教，都必需要有健康身體支持。