華迪暗黑伎倆　學對方後衞嘅母語粗口

李斯特城37歲王牌射手占美華迪即將發布全新紀錄片，講呢位一代神鋒嘅足球歷程，近日部分內容流出，最令網友驚奇嘅係，原來華迪多年來有一項「暗黑伎倆」，就係用粗口攻擊對方後衞。

講粗口係唔啱嘅，我哋唔應該講，但亦不能怪華迪教壞細路，事關球場上爆粗係好常見，至於華迪以粗口攻擊對方後衞，原來都要做事前準備，就係學講對方嘅粗口。

學講粗口竟然係華迪嘅備戰工作之一？原來真係。事關每場比賽負責看管華迪嘅後衞都唔同，每個後衞都有唔同國籍同來自唔同地方，而華迪嘅「備戰工作」，就係學習對方後衞母語嘅粗口點講，等到球場上同對方交手時，再用對方母語嘅粗口嚟攻擊對方，令對方犯錯，爭取入波機會。

呢招可以話係暗黑伎倆，正規足球訓練係唔會教，但華迪足球生涯入咁多波，證明佢呢招係非常有效。