曼城尾段崩潰被逼和 躁狂哥帥「暴力擁抱」
2025年01月15日 09:02
東網電視
更多新聞短片
哥迪奧拿賽後失控。
周三(15日)凌晨英超，近況回勇嘅曼城再遇挫折，領先2球下最後關頭突然崩潰，完場前8分鐘連失2球，作客被賓福特逼和2比2。領隊哥迪奧拿賽後大發脾氣，更捉住門將史堤芬奧迪加邊鬧邊進行「暴力擁抱」，行為異常。
賓福特同曼城今場鬥攻，雙方都有唔少機會，66分鐘奇雲迪布尼右路傳中，菲爾科頓門前起腳彈入；78分鐘沙雲奴射門被撲出，菲爾科頓快一步補中射成2比0。賓福特尾段大反擊，82分鐘尤尼韋沙龍門口無人看管下射入；補時階段基斯甸洛加特頭槌攻門，史堤芬奧迪加撲到照入，戲劇性追和2比2，哥迪奧拿嬲到踢廣告板洩忿。
哥迪奧拿完場後非常躁底，捉住史堤芬奧迪加激動狂鬧，但同時又攬住佢「暴力擁抱」。哥帥賽後就否認埋怨奧迪加：「我好滿意，我同佢講緊嘅只係一個個別動作，我讚佢用波好，我為佢嘅表現開心。」