祖雲達斯又和波　急借PSG前鋒救亡

周三(15日)凌晨意甲，祖雲達斯又和1場，作客被阿特蘭大逼和1比1，近8場聯賽有7場打和，不斷失分之下，爭標希望大受打擊。祖記為提升攻力，洗脫「和波專家」污名，已決定借用巴黎聖日耳門(PSG)前鋒高路梅安尼幫手。

祖雲達斯踢到下半場初段由後衞皮爾卡魯魯射入打開紀錄，阿特蘭大憑列迪古頂入扳平1比1，其實雙方創造唔少入波機會，但往往失之交臂，最終和氣收場。

祖雲達斯今季踢20場聯賽仍然不敗，但多達13場打和，已落後榜首拿玻里13分，為咗收復失地利，會方決定增兵。根據意大利傳媒報道，祖記已經同PSG達成協議，借用高路梅安尼半季，呢位26歲法國國腳今季法甲僅上陣10次入2球，加上PSG簽入拿玻里翼鋒基華拉斯基利亞後，佢更難有上陣機會，離隊成為最佳選擇。

另1場意甲，AC米蘭憑迪奧靴南迪斯、拉菲爾利亞奧各入1球，作客以2比1反勝科木，亦係新帥沙治奧干斯卡奧執教之後首場聯賽勝仗。