捷西斯證實ACL重創　阿仙奴搵救兵鎖定3目標

阿仙奴周二(14日)官方宣布，巴西前鋒加比爾捷西斯左膝ACL(前十字韌帶)重傷，將要進行手術根治，一般養傷期為半年至9個月，領隊阿迪達表明今個月會盡力引入前鋒替補，據報已鎖定3大目標人選。

繼布卡約沙卡做手術後，阿仙奴再冇埋捷西斯，阿迪達表示：「捷西斯嘅消息令情況大大複雜，球隊失去兩個好有創造力嘅重要球員，我哋好積極咁喺市場搵合適人選，不過冇任何球員可以保證一加盟即刻交到貨，我哋會盡力嘗試，而且已經有清晰嘅目標。」

據英國《太陽報》爆料，阿仙奴有3大目標人物，包括祖雲達斯前鋒杜辛華荷域、RB萊比錫嘅施斯高以及士砵亭射手約基利斯，不過3位前鋒都身價不菲，而且要對方球會喺季中放人亦有難度，阿仙奴或會提出以先借後買方式去完成收購。