利華古遜7連勝　哈利卡尼冠軍夢有暗湧

周三(15日)凌晨德甲，衞冕嘅利華古遜主場以1比0擊敗緬恩斯，取得聯賽7連勝，追至只落後踢少1場嘅榜首拜仁慕尼黑1分，似有後來居上之勢，拜仁球星哈利卡尼想一嘗職業生涯首項冠軍滋味，恐怕有暗湧。

利華古遜今仗佔盡上風，猛攻對手，包括艾斯基柏拉斯奧斯近門失機，科利安華迪斯遠射貼柱出界。換邊後僅3分鐘，利華古遜後衞歷斯基莫度主射罰球入網打開紀錄，並繼續發動攻勢，科利安華迪斯再次施展遠射，被緬恩斯門將羅賓辛迪拿撲出，最終維持1比0完場。

利華古遜走勢凌厲，各項正式賽事10連勝，咬住拜仁慕尼黑唔放，雙方將於2月中交鋒，可能成為決定今季德甲冠軍誰屬最關鍵一仗。

另1場德甲爆出冷門，護級球隊基爾主場以4比2擊敗多蒙特，開出6.1倍主W及80倍波膽。多蒙特遭遇聯賽2連敗，爭入前4位機會大受打擊，教練紐尼沙軒帥位愈來愈危。