羅馬「慘和」波圖　折損兩位大將

周五(14日)凌晨歐霸盃附加賽首回合，羅馬作客被波圖逼和1比1之餘，更加損兵折將，中場白賴仁基斯坦迪食紅牌，次回合需要停賽，前鋒保羅戴巴拿受傷，代價非常大。

羅馬今仗踢法主動，並喺上半場補時，由後衞薛基施歷窄角度射入打開紀錄，換邊之後，波圖透過1次快速反擊，由中場法蘭斯高摩拉射入扳平。僅過5分鐘，羅馬中場白賴仁基斯坦迪拉跌對手，被球證出示第2張黃牌，兩黃變一紅被逐，波圖趁機強攻對手，但攻門往往失之交臂，最終打和1比1，雙方將於下周五(21日)凌晨踢次回合。

賽後羅馬教練雲尼亞里批評球證偏幫波圖，猶如想「協助」對方取勝，令呢位73歲老帥最頭痛都係前鋒保羅戴巴拿踢到40分鐘傷出，可能缺陣下周一(17日)凌晨意甲作客帕爾馬。